Skets op die Internet

Ek het 'n oulike Paint-tipe program op die Internet ontdek by www.wiiplayable.com. Dit laat jou toe om direk in jou webblaaier tekeninge te skep wat jy dan as PDF-lêers kan spaar.

Hier is my eerste poging met die program:

Wag

Ek stort my drang uit
Op eilande waar die sand nog klam is,
besmet met die amniotiese vloeistof van ons oergeboorte
Wat nêrens is behalwe naby en ver
en ver en naby aan die eerste asemteug

Hoe gering is my hart
Hoe reëlmatig my pols
Hoe diep is my heimwee
Hoe nietig is ek en verlate
Sonder herinnering aan sterre of heling

Die growwe skurfte van my gebeente
kontrasteer met perlemoen-gladde fossiele

Steeds wag ek op opstanding en geluksaligheid

Buffalo buffalo Buffalo buffalo buffalo buffalo Buffalo buffalo

Ek het op hierdie interessante Engelse sin afgekom op Wikipedia:

Buffalo buffalo Buffalo buffalo buffalo buffalo Buffalo buffalo.

Gramaties is dit 'n korrekte Engelse sin, alhoewel ietwat lomp en dubbelsinnig. Bestaan daar 'n soortgelyke sin in Afrikaans?

Kindle

My nuwe Kindle is gister afgelewer en dit oorskry my stoutste verwagtinge.

Uiteindelik! 'n Elektroniese apparaat wat werklik iets werd is.

Sondagoggend

Dis Sondagoggend.

Ronde druppels biggel uit die geute
en die oggend is koel na ‘n nag van reën.
By die stroom roep paddas fluitkeels.

Almal rus.

Die oggend is gehul in ‘n heilige groen skemerte
- ‘n onverwagte verlossing -
totdat die moeras van somer ons opnuut bedwelm.

Ek wil 'n huis bou

Ek wil 'n huis bou,
onder teen die hang
van Kilimanjaro,
met 'n breë stoep
en houtvloere
en 'n hoë plafon.
En 'n tuin uitlê,
met beddings en 'n grasperk
en 'n koelteboom
- vir skadu teen die son -
wat vlekke silwer lig deur laat
drup tot binne-in my ingewande
- dat ek heel kan word.

Wentelwoorde

ek pos my woorde in 'n brief
in 'n spierwit papierkoevert
sonder 'n seël
sonder 'n geadresseerde
sonder 'n afsender
sonder 'n lugposseël
ek lanseer my brief vanaf my lessenaar
tot hoog, hoog bó in die atmosfeer
laat hy val waar hy wil
laat my woorde val waar hulle wil
partykeer land my woorde in 'n wentelbaan
wentelwoorde
wat iewers
dalk
tot nut kan wees